2024 ОНЫ 12 ДУГААР САРЫН ДУНД АРАВ ХОНОГИЙН ТОЙМ

Температур: Арав хоногийн агаарын дундаж температур Дархадын хотгор болон томоохон голын хөндийгөөр 20.1-28.4 градус, бусад нутгаар 12.5-20.0 градус хүйтэн (1 дүгээр зураг) буюу олон жилийн дундажтай харьцуулахад  нутгийн баруун өмнө, төв болон өмнөд хэсгээр олон жилийн дунджийн орчим буюу түүнээс 1.2-1.7 градусаар хүйтэн, бусад нутгаар дунджаас 1.1-4.2 градус дулаан байв.   

Дархадын хотгороор шөнөдөө -24...-37 градус, өдөртөө -18...-27 градус, томоохон голын хөндийгөөр шөнөдөө -20...-33 градус, өдөртөө -14...-24 градус, бусад нутгаар шөнөдөө -14...-26 градус, өдөртөө -6..-19 градус хүйтэн байлаа.

Тунадас: 11-нд ихэнх нутгаар 0.0-1.0мм, 11-нээс 12-ны шөнө зарим газраар 0.0-0,6мм, 17, 19-нд зарим нутгаар 0.0-0.9мм, 18-нд ихэнх нутгаар 0.0-2,0мм, 20-нд Ханхад 0,0мм цас (2 дугаар зураг) оров. Орсон тунадасыг олон жилийн дундажтай харьцуулахад Рэнчинлхүмбэ, Ханх сумдын нутгаар олон жилийн дунджаас бага, бусад нутгаар дунджийн орчим буюу түүнээс ахиу тунадас орсон.

Салхи: Их төлөв баруунаас секундэд 0-10 метр, хугацааны эхээр зарим нутгаар түр зуур секундэд 12-14 метр, 19-нд Бүрэнтогтоход түр зуур секундэд 12 метр хүрч ширүүсэв.

Цасан бүрхүүл: Арав хоногт нэг удаа хийдэг хээрийн цасны хэмжилтийн мэдээгээр 12 дугаар сарын 20-ны байдлаар Бүрэнтогтох сумын төвөөр цасгүй, Төмөрбулаг сумын нутгаар тарлан цастай, бусад нутгаар 1-6 см зузаан цасан бүрхүүлтэй (3 дугаар зураг) байв.