2023-2024 ОНЫ ӨВӨЛ-ХАВРЫН БЭЛЧЭЭРИЙН ДААЦЫГ ТОДОРХОЙЛСОН ДҮН

Засгийн газрын 286 дугаар тогтоолын дагуу Ус цаг уур, орчны судалгаа, мэдээллийн хүрээлэнд 2023-2024 оны өвөл, хаврын бэлчээрийн даацыг баг бүрийн бэлчээрийн ургац, малын тоо, бэлчээрийн талбайн хэмжээ, бэлчээр ашиглах хугацаа зэрэг мэдээлэл дээр үндэслэн багийн нутгаар тооцоолж гаргав.

Зуншлагын байдлыг 10 хоног тутамд үнэлж, зурагласан мэдээгээр 8 дугаар сарын 20-ны байдлаар Хөвсгөл аймгийн нийт нутгаар зуншлага сайн гэж үнэлэгдсэн байна.

Бэлчээрийн даацыг тооцоолж гаргасан дүнгээс үзвэл аймгийн нийт нутгийн:

44.9 % - Бэлчээрийн нөөцтэй

22.4 % - Бэлчээр хүрэлцээтэй

24.3 % - Даац 1-3 дахин хэтэрсэн

6.7 % -   Даац 3-5 дахин хэтэрсэн

 1.7% - Даац олон дахин хэтэрсэн байна. 

Өөрөөр хэлбэл ирэх өвөл-хаврын бэлчээрийн даац нутгийн 70 орчим хувьд хүрэлцээтэй байхаар, харин 30 гаруй хувьд хэтэрч гарлаа.

Сумын дүнгээр авч үзвэл Арбулаг, Алаг-Эрдэнэ, Цагаан-Уул, Бүрэнтогтох, Төмөрбулаг, Галт, Жаргалант,  Тосонцэнгэл сумдын ихэнх багийн нутгаар даац хэтэрч гарсан байна.           

Бэлчээрийн даац олон дахин хэтэрч (улаан) гарсан сумдад Бүрэнтогтохын Их-Уул, Түнэлийн Баян-Эрхэт багууд хамрагдаж байна.

Харин Ханхын Баясгалант, Цагаан-Уулын Тосон, Арбулагын Бор гол, Хавтага, Төмөрбулагийн Жаргалант, Нарийн, Галтын Нүхт, Жаргалантын Харгана, Тосонцэнгэлийн Мухар хөндий, Сэлэнгэ, Тээл багуудын нутгаар 3-5 дахин хэтэрч (улбар шар) гарлаа. Мөн нутгийн 24,3 хувьд даац 1-3 дахин хэтэрч (шар) гарсан.

Энэ жил хур бороо элбэг, зуншлага сайн байсан зарим нутгаар даац хэтэрч гарсанд малын тоо их байгаа нь нөлөөлж байна.

Ийнхүү өвөл, хаврын бэлчээрийн даац хэтэрч гарсан сумдын нутагт өвс хадлан бэлтгэх, нэмэгдэл тэжээл олж нөөцлөх, отор нүүдэл хийх, малаа борлуулах, тоог бууруулах зэрэг арга хэмжээг авч хэрэгжүүлж, өвөлжилт хаваржилтанд эртнээс бэлтгэж, зудын эрсдэлийг тооцож ажиллах шаардлагатай байна.

ХӨВСГӨЛ АЙМГИЙН УЦУОШТӨВ

2023-08-30