2022 оны 5 дугаар сарын дунд арав хоногийн тойм

Температур: Арав хоногийн агаарын дундаж температур нутгийн баруун болон хойд хэсгээр 6.6-10.5 градус, бусад нутгаар 10.6-15.1 градус дулаан (1 дүгээр зураг) буюу Баянзүрх, Хатгал, Мөрөн, Эрдэнэбулган, Цагаан-Үүр, Рашаант, Шинэ-Идэр, Жаргалант сумдын нутгаар дунджийн орчим, бусад нутгаар олон жилийн дунджаас 1.3-4.6 градусаар дулаан байлаа.

Хугацааны эхээр сэрүүн байсан бол дунд үеэс өдөртөө дулаарч нутгийн баруун ба хойд хэсгээр шөнөдөө 1-7 градус, өдөртөө 16-24 градус, бусад нутгаар шөнөдөө 2-10 градус, өдөртөө 22-29 градус дулаан байв.

Тунадас: 11-нд Арбулагт 0.0мм, 17, 18-нд зарим нутгаар 0.0-3.6мм, 19-нд Рашаант, Баянзүрхэд 0.1-0.3мм бороо оров. Орсон тунадасыг олон жилийн дундажтай харьцуулахад Цагааннуур орчмоор дунджаас ахиу, бусад нутгаар дунджаас бага тунадас (2 дугаар зураг) орсон.

Салхи: 16, 17-нд баруун хойноос 5-14м/с, зарим нутгаар түр зуур 12-20м/с хүрч ширүүсэв. Бусад хугацаанд баруун, баруун хойноос 0-9м/с, зарим нутгаар түр зуур 11-14м/с хүрч ширүүсэв.  

Бэлчээрийн ургамлын ургалт: 5 дугаар сарын 20-ны байдлаар Хатгал орчмоор ургамлын ургалтын байдал муу, нутгийн баруун хэсэг болон Тариалан, Төмөрбулаг сумдын нутгаар дунд, бусад нутгаар сайн (3 дугаар зураг) байна.