2022 оны 4 дүгээр сарын сүүлчийн арав хоногийн тойм

Температур: Арав хоногийн агаарын дундаж температур нутгийн баруун болон хойд хэсгээр 3.4 градус хүйтнээс 1.5 градус дулаан, бусад нутгаар 1.6-7.2 градус дулаан (1 дүгээр зураг) буюу Улаан-Уул, Арбулаг, Цагаан-Уул, Төмөрбулаг, Түнэл, Чандмань-Өндөр, Их-Уул сумдын нутгаар олон жилийн дунджийн орчим, бусад нутгаар дунджаас 1.2-2.9 градусаар хүйтэн байлаа.

Нутгийн баруун ба хойд хэсгээр шөнөдөө 4-14 градус хүйтэн, өдөртөө 4 градус хүйтнээс 8 градус дулаан, бусад нутгаар шөнөдөө 1-9 градус хүйтэн, өдөртөө 3-14 градус дулаан байлаа. 25-нд өдөртөө нийт нутгаар хүйтэн байсан бол хугацааны сүүлчээр нийт нутгаар дулаарсан байна.

Тунадас: Арав хоногийн эхний хагаст зарим нутгаар 0.0-10.7мм хур тунадас оров. Орсон тунадасыг олон жилийн дундажтай харьцуулахад Цэцэрлэг, Жаргалант орчмоор дунджаас ахиу, Цагааннуур, Шинэ-Идэр сумдын нутгаар дунджийн орчим, бусад нутгаар дунджаас бага тунадас (2 дугаар зураг) орсон.

Салхи: Баруун, баруун хойноос 2-15м/с, 22, 23, 24, 25-нд ихэнх, 26-наас бусад хугацаанд зарим нутгаар түр зуур 10-21м/с хүрч ширүүсэн явган шуурга шуурав.

Бэлчээрийн ургамал: 4 дүгээр сарын 30-ны байдлаар нутгийн зүүн болон өмнөд хэсэг, Улаан-Уул, Баянзүрх сумдын нутгаар бэлчээрийн ургамал цухуйсан бөгөөд нутгийн өмнөд хэсгээр ургамлын ургалтын байдал хэвийн, зарим нутгаар дунд буюу ургамал оройтож цухуйсан, ганц нэг сумдын нутгаар муу буюу ургамал цухуйсан боловч мал бэлчээх боломжгүй. Харин нийт нутгийн 40 орчим хувьд ургамал цухуйгаагүй (3 дугаар зураг) байна.